इनरुवा, २१ चैत्र । कोशी प्रदेश सरकारले सन् २०८२ लाई १६ लाख पर्यटक भित्राउने लक्ष्य सहित पर्यटन वर्षको रूपमा मनाउने तयारी गरेको छ।
मन्त्रालयले इनरुवामा आयोजना गरेको सञ्चारकर्मीहरूसँगको छलफल कार्यक्रममा पर्यटन, वन तथा वातावरण मन्त्री सदानन्द मण्डलले पर्यटन वर्षको योजना र लक्ष्यबारे जानकारी दिएकोे हो।
मन्त्री मण्डलले पर्यटन क्षेत्रको दिगो विकासमार्फत रोजगारी वृद्धि र राष्ट्रिय पुँजी निर्माण गर्न पर्यटन वर्ष मनाउन लागिएको जानकारी दिए। उनले आगामी चैत्र २७ गते तीनजुरे मिल्केमा प्रधानमन्त्री केपी शर्मा ओलीले पर्यटन वर्षको उद्घाटन हुने बताए । उद्घाटन समारोहमा विशेष कार्यक्रमको आयोजना गरिनेछ भने छिमेकी मुलुकका पर्यटन व्यवसायी, पत्रकार, कूटनीतिक नियोगका पदाधिकारी र मन्त्रीहरूलाई आमन्त्रण गरी पर्यटन प्रवद्र्धन गरिने योजना रहेको जानकारी दिए ।
प्रदेश सरकारले सन् २०८२ मा १६ लाख पर्यटक भित्र्याउने लक्ष्य राखेको छ। यसका लागि भारत, भुटान र बंगलादेशमा पर्यटन प्रवद्र्धन कार्यक्रम सञ्चालन गरिनेछ। साथै, पर्यटकले भोग्नुपर्ने असुविधा र कठिनाइ हटाउन विशेष पहल गरिने मन्त्री मण्डलले बताए।
कार्यक्रममा पर्यटन, वन तथा वातावरण समिति सभापति रामदेव यादव, प्रदेश सांसदहरू रामप्रसाद मेहता, निरा खनाल र मिना श्रेष्ठको सहभागिता रहेको थियो।