इनरुवा, २१ चैत्र । सुनसरीको कोशी गाउँपालिका वडा नं. ७ बाट अपहरणमा परेकी बालिकाको प्रहरीले सकुशल उद्धार गरेको छ ।
बुधबार अपहरणमा परेकी कोशी गाउँपालिका ७ मुसहरी टोल बस्ने कुशेश्वर सदाको ७ वर्षीया छोरी ईशु सदालाई जिल्ला प्रहरी कार्यालय सुनसरीको टोलीले आज (बिहीबार) उद्धार गरेको हो।
बालिकालाई सुनसरीबाट कोशी ब्यारेज हुदै सप्तरी तर्फ लैजाँदै गर्दा २६ नम्बर ढोकाबाट उद्धार गरी अपहरणमा संलग्न व्यक्तिलाई पक्राउ गरिएको सुनसरीका प्रहरी प्रमुख एसपी सुमनकुमार तिम्सिनाले बताए् । उनले बुधबार दिउँसो १ः५० बजे बालिका अपहरणमा परेको खबर पाउने बित्तिकै डीएसपी योगराज खतिवडाको नेतृत्वमा नौ जना प्रहरीको टोली परिचालन गरी बालिकाको उद्धार गर्न प्रहरी सफल भएको बताए ।
बालिका अपहरण गर्ने सप्तरीको कञ्चनरुप नगरपालिका १२ स्थित धरमपुर घर भएका जितुवा भन्ने जितेन्द्र साह (हलुवाइ)लाई पक्राउ गरिएको एसपी तिम्सिनाले बताए।
घर अगाडि खेलिरहेकी बालिकालाई साहले सिटि सफारीमा हालेर अपहरण गरेको सीसीटीभी फुटेजको सहायतामा बालिकालाई उद्धार गरिएको हो । अपहरणकारी साहलाई जिल्ला प्रहरी कार्यालय सुनसरीको हिरासतमा राखेर घटनाको अनुसन्धान थालिएको एसपी तिम्सिनाले बताए ।