इनरुवा, ७ साउन । धरान उपमहानगरपालिकाले आर्थिक वर्ष २०८१/०८२ को लागि १ अर्ब ८९ करोड ४३ लाख ४८ हजार २ सय ८० को बजेट बिनियोजन गरेको छ । यसअघि नगरप्रमुख हर्क साम्पाङ र वडाध्यक्षहरुबीच विवादका कारणले निर्धारित समयमा बजेट पेस गर्न सकेको थिएन ।
आइतबार सम्पन्न १५ औं नगरसभामा उपप्रमुख अईन्द्रविक्रम बेघाले प्रस्तुत गरेको बजेट नीति तथा कार्यक्रममा आर्थिक वर्ष २०८१/०८२ को लागि १ अर्ब ८९ करोड ४३ लाख ४८ हजार २ सय ८० को बजेट बिनियोजन गरिएको हो ।
आर्थिक वर्षका ०८१/८२ लागि आन्तरिक राजस्वबाट ४८ करोड ४१ लाख ३४ हजार २ सय ८०, संघीय सरकार अनुदानबाट ८९ करोड १९ लाख, प्रदेश सरकार अनुदान ६ करोड ४० लाख ६४ हजार सघीय राजस्व बाँडफाँडबाट २१ करोड ३४ लाख र प्रदेश राजस्व बाँडफाँडबाट २४ करोड ८ लाख ५० हजार प्राप्त हुने अनुमान गरिएको छ । उक्त अनुमानमध्ये २० वटै वडातर्फ २१ करोड तथा सम्झौता तथा कार्यक्रम सम्पन्न भई भुक्तानी हुन नसकेको क्रमागत आयोजनका लागि ३ करोड रुपैयाँ विनियोजन गरिएको छ ।
शिक्षा युवा तथा खेलकुदतर्फ सशर्त अनुदान ४३ करोड ८६ लाख ९५ हजारसमेत गरी ४६ करोड २६ लाख ९५ हजार रुपैयाँ विनियोजन गरिएको छ ।
स्वास्थ्यतर्फ घोषित विभिन्न नीति तथा कार्यक्रमलाई संबोधन गर्न सशर्त अनुदान ७ करोड ६३ लाख ८४ हजार समेत गरी ८ करोड ३ लाख ८४ हजार बजेट विनियोजन गरिएको छ । सामाजिक विकासतर्फ सामाजिक समावेशीकरण, सकारात्मक विभेद तथा लक्षित कार्यक्रमहरु संचालन गर्न करोड ४१ लाख बजेट विनियोजन गरिएको छ । आर्थिक विकासतर्फ अर्थतन्त्रको मेरुदण्डको रुपमा रहेको कृषि, पशु, सहकारी र उद्योगसम्बन्धी विभिन्न कार्यक्रमा संचालन गर्न सशर्त अनुदान १ करोड १५ लाख ४४ हजारसमेत गरी १ करोड ८४ लाख ९४ हजार बजेट विनियोजन गरिएको छ ।
वन वातावरण उर्जा तथा विपद व्यवस्थापनतर्फ विपद व्यवस्थापनको पूर्वतयारी लगायतका काम र विपद् व्यवस्थापन कोषको लागि आन्तरिक स्रोतबाट ब्यहोरिने १ करोड ४० लाख बजेट विनियोजन गरिएको छ । पर्यटनतर्फ धार्मिक, सांस्कृतिक तथा बहुजातीय विविधतायुक्त धरानलाई पर्यटकीय गन्तव्य स्थलको रुपमा विकास गर्न छनौट भएका कार्यहरुका लागि भन्दै २७ लाख ५० हजार र सशर्त अनुदानसमेत गरी ९० लाख ५० हजार बजेट विनियोजन गरिएको छ ।
सूचना तथा संचार क्षेत्रको विकासका लागि आन्तरिक स्रोतबाट २५ लाख ५० हजार बजेट विनियोजन गरिएको छ । कानुन तथा न्याय सम्पादनतर्फ आन्तरिक स्रोतबाट १० लाख बजेट विनियोजन गरिएको छ ।