विराटनगर, २७ बैशाख । कोशी प्रदेशका मुख्यमन्त्रीको रुपमा तेस्रो पटक हिक्मतकुमार कार्की नियुक्त भएका छन् । प्रदेशमा सरकार बनाउने झेलका विच उनी तेस्रो पटक मुख्यमन्त्रीमा नियुक्त हुन सफल भएका हुन ।
पहिलो पटक उनी २०७९ पुस २८ मा एमाले–माओवादी गठबन्धनबाट मुख्यमन्त्री बनेका थिए । दोस्रो पटक भने संविधानको धारा १६८ (२) अनुसार सरकार बन्न नसक्दा सर्वोच्च अदालतको परमादेशबाट उपधारा (३) अनुसार ठुलो संसदीय दलको नेताको हैसियतमा २०८० भदौ २२ गते मुख्यमन्त्री नियुक्त भएका थिए ।
केन्द्रीय सत्ता राजनीतिमा गठबन्धन फेरबदल भएसँगै तेस्रो पटक कार्की मुख्यमन्त्रीमा नियुक्त भएका हुन् । यसअघि २०७९ पुस २८ र २०८० भदौ २२ गते गरी दुई पटक मुख्यमन्त्री बनेका थिए ।
प्रदेश प्रमुख पर्शुराम खापुङले बुधबार नयाँ सरकार गठनको आह्वान गरेअनुसार बिहीबार दिउँसो कार्कीलाई संविधानको धारा १६८ को उपधारा (५) अनुसार मुख्यमन्त्रीमा नियुक्त गरेका हुन् ।